جفرا يا بلادي !!
د. عبد القادر فارس
أمد/ ( مهداة لروح " صاحب جفرا " وشاعر الثورة الراحل الكبير عز الدين مناصرة )
جفرا ويا ها الربع
يا ناس بالله دِلونا
على اللي غادرونا
وفي الحُزن خلونا!!
***
الدار يا جفرا خَلا
ونهارنا صار ليلنا
يا ربِ تِرجع جفرا
نكَحِّل منها العيونا!!
***
جفرا ويا ها الربع
الغربة صارت وطن
والوجع زاد وغرَّبونا
وفي بلادنا قسمونا!!
***
يا جفرا ضاع الوطن
وببلاد بعيدة تّوَّهونا
بَجاه الرسول النبي
طيب ليش قولولنا؟!
****
جفرا ويا ها الربع
زمان كان العزم منا
والثورة هي الشرف
وسلاحنا في إيدينا!!
***
يا جفرا الرفاق تفرقوا
صارت وِحدتنا الهدف
لكن وين الوطن وينا
آه .. يا حيف علينا!!
***
جفرا ويا ها الربع
العرب في ربيعهم
ضاعوا وضَيّعونا
ووَحدنا للعِدا تركونا!!
***
يا جفرا غنى الحادي
في كل سهل ووادي
سقى الله عَ أيام زمان
ميجنا وجفرا ودلعونا!!